Երկրի ղեկավարը հայտարարեց` ԼԳԲՏ-ն իր պաշտպանության ներքո է, իսկ փաստաբանները պաշտպանված չեն. փաստաբան
Խոշտանգումների ոլորտում Հայաստանում իրավակարգավորումների առումով կարծես թե որեւէ լուրջ խնդիր չկա, կոնվենցիայի ոգուն համահունչ առկա են բոլոր իրավակարգավորումները, սակայն դրանց պրակտիկ կիրառման առումով ունենք չափազանց մեծ խնդիրներ: Այս մասին այսօր՝ հունիսի 26-ին, «Մեդիա-կենտրոն»-ում «Խոշտանգումների զոհերի միջազգային օր. ոստիկանական բռնություններն ու անպատժելիությունը» թեմայով ասուլիսում հայտնեց փաստաբան Կարեն Ալավերդյանը:
«Եթե նույնիսկ հետխորհրդային երկրների մակարդակով նայենք, բավականին մտահոգիչ է ՀՀ-ում տիրող իրավիճակը: Խոսքը վերաբերում է առաջնահերթ նախորդող ժամանակահատվածում կոնկրետ փաստաբանների նկատմամբ ոստիկանության բաժիններում արձանագրված դեպքերին եւ դրանց քննության ընթացքում արձանագրված բավականին մտահոգիչ պատկերին: Այս դեպքերը համոզմունք են ձեւավորում, որ ՀՀ-ում փաստաբանի մասնագիտական գործունեությունը բավականաչափ երաշխավորված չէ:
Երկրի փաստացի ղեկավարը ԱԺ ամբիոնից հայտարարեց, որ սեռական փոքրամասնությունները գտնվում են իր անմիջական պաշտպանության ներքո եւ դրա հետ համընկնող ժամանակահատվածում ունեցանք դեպք, երբ որ այդ համայնքի ներկայացուցիչները ոստիկանության Կենտրոնականի բաժին ներխուժեցին, նաեւ բռնություն կիրառեցին ոստիկանների նկատմամբ, սակայն ոստիկանների կողմից ոչ միայն որեւէ համաչափ արձագանք չեղավ, նաեւ հայտնի չէ, թե ինչ հետագա ընթացք ստացավ քրեաիրավական գնահատականի առումով:
Սրան զուգահեռ, տեսնում ենք, որ փաստաբանների նկատմամբ կարող են կիրառվել անհանդուրժելի իրավիճակներ»,-ասաց նա:
Փաստաբանը հիշատակեց ոստիկանության Էրեբունու բաժնում տեղի ունեցած դեպքը, որտեղ բռնություն էր կիրառվել երկու փաստաբանների նկատմամբ. «Գործն ուղարկվել է դատարան, ընդամենը միջանձնային կոնֆլիկտի հոդվածով: Որեւէ գնահատական չկա, թե այդ ամենը ինչքանով է խոչընդոտել փաստաբանական գործունեությանը: Ավելին, այդ ոստիկանները, որոնց պաշտոնավարումը ժամանակավորապես դադարեցվել էր, կրկին վերականգնվել են իրենց պաշտոնին»:
