Այգեստանի դպրոցում 6 աշակերտի ինքնազգացողությունը վատացել է․ վարչական ղեկավարը հայտնել է պատճառը․ «Փաստինֆո»
Արարատի մարզի Այգեստան գյուղի միջնակարգ դպրոցում 6 երեխայի ինքնազգացողությունը վատացել է, սակայն այժմ նրանց վիճակը լավ է։ Այս մասին «Փաստինֆո»-ին հայտնել է Այգեստանի վարչական ղեկավար Արգիշտի Վարդանյանը։
Դեպքը տեղի է ունեցել երեկ` սեպտեմբերի 25-ին` դասերի ժամանակ։ Երեխաների ինքնազգացողությունը վատանալուց հետո դպրոցից շտապօգնություն են կանչել։
Աշակերտները տեղափոխվել են հիվանդանոց, որտեղ նախնական զննություն են անցել։ Դրանից հետո նրանք վերադարձել են դպրոց և շարունակել մասնակցել դասերին։
Արգիշտի Վարդանյանի խոսքով՝ դեպքը կապված է եղել շոգ եղանակի հետ։
«Շոգի պատճառով երեխաների մոտ շնչառական քաղց է առաջացել, ինչը կարող է պատահել յուրաքանչյուրի հետ։ Ոչ մի լուրջ բան չի եղել»,- «Փաստինֆո»-ին ասել է նա։
Վարչական ղեկավարը նշել է, որ շտապօգնության ահազանգից հետո ինքն անմիջապես եղել է դպրոցում։ Նրա խոսքով՝ առաջին օգնությունը երեխաներին ցուցաբերել են բնակավայրի բուժաշխատողները, և մինչև շտապօգնության մեքենայի ժամանելը նրանց վիճակն արդեն կայունացել էր։
Վարդանյանը նաև վստահեցրել է, որ դպրոցում խմելու ջրի կամ ճաշարանի հետ կապված խնդիրներ չկան։
Նրա խոսքով՝ դպրոցը նոր է վերակառուցվել և համապատասխան պայմաններով ապահովված է։
«Փառք Աստծո, լուրջ ոչինչ չկա»,- նշել է Այգեստանի վարչական ղեկավարը։
