Փաշինյանի ամանորյա «նվերը»․ Հայաստանում սոցիալական բունտ է հասունանում
Ջրի թանկացմանը հաջորդեց նաև էլեկտրաէներգայի սակագինը բարձրացնելու որոշումը. փետրվարի 1-ից բաժանորդները միջինը 4,7 դրամով ավելի կվճարեն սպառած յուրաքանչյուր կիլովատտի համար։ Հոսանքի թանկացման հիմնական պատճառները ատոմակայանի համար վերցված վարկերի բեռն ու ռուսական «Գազպրոմ» ընկերության նկատմամբ չկատարված պարտավորություններն են։
Ավելորդ է ասել, որ թանկացումների այս ալիքը՝ երկրում այս տարի արձանագրված ավելի քան 17 տոկոս գնաճով, սոցիալական լուրջ լարվածություն է ստեղծում, մանավանդ, որ 2022 թվականի պետական բյուջեով նախատեսված չէ թոշակների ու նպաստների բարձրացում, պետական աշխատողների աշխատավարձերը մնալու են նույնը։ Ավելին, հաջորդ տարվա բյուջեն կազմվել է՝ առանց հաշվարկելու էլեկտարէներգիայի սակագնի բարձրացման հետևանքով առաջացող ռիսկերը, ըստ այդմ՝ գերագնահատվել են բյուջեում նկարագրված սոցիալական ծրագրերը ու, մեղմ ասած, հաջորդ տարվա համար կանխատեսվող գնաճի հաշվարկման հիմքում բացակայում են հոսանքի թանկացման սոցիալական հետևանքները։
Օրինակ, հաշվի չի առնվել այն հանգամանքը, որ էլեկտրաէներգիան համակարգաստեղծ նշանակություն ունի ու նրա սակագնի բարձրացումն իր հետ բերելու է մի շարք ապրանքների ու ծառայությունների գների աճ։
Հայաստանում անվտանգային ռիսկերին, քաղաքական ճգնաժամին, անարդյունավետ կառավարմանը, տնտեսության լճացմանը ավելանում է նաև սոցիալական լարվածությունը։ Այս համատեքստում ավելի մեծանալու է խզումը հասարակության և իշխանությունների միջև՝ ակնհայտորեն հակադրության մեջ դնելով նրանց օրակարգերը։
Նման իրավիճակում սոցիալական բունտի հեռանկարը միանգամայն իրական է թվում, մանավանդ, որ իշխանությունն ակնհայտորեն չի կարողանում զսպել ախորժակը՝ իր երկարակեցության բանալին համարելով գոյություն ունեցող ինստիտուտների փոշիացումը, հանրային և սոցիալական հարաբերություններում տոտալ անհանդուրժողականության սերմանումը։ Այս ամենը բումերանգի էֆեկտ է ունենալու, մանավանդ, որ օխլոսը չի հանդուրժում մշտական կուռքեր։
Վահրամ Բագրատյան
