Փաշինյանն ու Մակրոնը քննարկել են հայ-ֆրանսիական հարաբերություններն ու Հայաստան–ԵՄ համագործակցությունը

ՀՀ վարչապետ Նիկոլ Փաշինյանը և Ֆրանսիայի նախագահ Էմանուել Մակրոնը Փարիզում հանդիպում են ունեցել, որի ընթացքում քննարկել են Հայաստանի և Ֆրանսիայի միջև համագործակցության զարգացմանն առնչվող հարցեր։
Հանդիպման ընթացքում կողմերն անդրադարձել են ենթակառուցվածքների ոլորտում և այլ ուղղություններով իրականացվող համատեղ ծրագրերի ընթացքին՝ կարևորելով երկկողմ համագործակցության շարունակական զարգացումը։
Քննարկման առանցքային թեմաներից է եղել նաև Հայաստանի և Եվրոպական միության միջև հարաբերությունների խորացումը։ Մասնավորապես, անդրադարձ է կատարվել Հայաստան–ԵՄ վիզաների ազատականացման գործընթացին, ինչպես նաև Եվրամիության աջակցությամբ Հայաստանում իրականացվող բարեփոխումների ընթացքին։
Հանդիպման ընթացքում քննարկված հարցերը վերաբերել են ինչպես հայ-ֆրանսիական երկկողմ հարաբերություններին, այնպես էլ Հայաստանի և Եվրամիության միջև համագործակցության հետագա զարգացմանը։




















