Վահրամաբերդում տեղի ունեցած սպանության կասկածյալներից մեկը գյուղապետի եղբայրն է

Ինչպես ավելի վաղ տեղեկացրել ենք,  օգոստոսի 9-ին  սպանություն է տեղի ունեցել Շիրակի մարզում։ Ժամը 20։40-ի սահմաններում  օպերատիվ տեղեկություններ են ստացվել, որ Գյումրու բժշկական կենտրոն է  տեղափոխվել 2 քաղաքացի, որոնցից մեկը՝ մահացած։

Ինչպես մանրամասնում է ֆոտոլրագրող Գագիկ Շամշյանը՝ հղում անելով իր ձեռքի տակ եղած օպերատիվ տեղեկություններին, օգոստոսի 9-ին՝ ժամը 17։00-ի սահմաններում, Վահրամաբերդ բնակավայրի եկեղեցու մոտ մի կողմից Ա․ Թառլոյանի, Լ․ Թառլոյանի և մյուս կողմից Վահրամաբերդ գյուղի բնակիչ 36-ամյա Սարո Հովհաննիսյանի, Գյումրի քաղաքի բնակիչ 37-ամյա Վարազդատ Հովհաննիսյանի և Վահրամաբերդ գյուղի բնակիչ 34-ամյա Զորի Հովհաննիսյանի միջև տեղի ունեցած վիճաբանության ժամանակ Ա․ Թառլոյանը իր մոտ եղած դանակով հարվածել է Զ․ Հովհաննիսյանին, որից հետո վերջինս իրեն պատկանող «Mercedes» մակնիշի ավտոմեքենայի միջից վերցրել է 12 մմ տրամաչափի երկփողանի որսորդական հրացանը և կրակոցներ արձակել Ա․ և Լ․ Թառլոյանների ուղղությամբ, ապա «Mercedes»-ով հեռացել է դեպքի վայրից։

Դեպքի վերաբերյալ ոստիկանությունում արդեն բացատրություն է տվել Վահրամաբերդ գյուղի բնակիչ 36-ամյա Սարո Հովհաննիսյանը, ով Վահրամաբերդ բնակավայրի վարչական ղեկավարն է և ականատես է եղել վիճաբանությանը։ Գ․ Շամշյանի տեղեկություններով՝   նշված սպանության մեջ կասկածյալներից մեկը նրա եղբայրն է։