Եվրոպայում վախենում են Ռուսաստանի դիվերսիաներից և կիբերհարձակումներից

Եվրոպական երկրների ղեկավարները մտավախություն ունեն, որ Ռուսաստանում ընտրություններից հետո Մոսկվան կարող է կտրուկ ակտիվացնել հիբրիդային գործողությունները Եվրոպայի դեմ։ Այս մասին գրում է The Telegraph-ը։

Պարբերականի փոխանցմամբ՝ եվրոպական անվտանգության կառույցներում մտահոգություն կա, որ Ուկրաինայի դեմ գործողությունները կարող են վերածվել ՆԱՏՕ-ի տարածքի դեմ ավելի բաց արշավի։

Խոսքը հնարավոր դիվերսիաների, կիբերհարձակումների, տարբեր սադրանքների և ՆԱՏՕ-ի սահմանների անմիջական հարևանությամբ գործողությունների մասին է։ Աղբյուրների գնահատմամբ՝ նման քայլերով Մոսկվան կարող է փորձել ստուգել, թե ինչպես կարձագանքի Հյուսիսատլանտյան դաշինքը։

Այս մտահոգությունների ֆոնին Ֆրանսիայի նախագահ Էմանուել Մակրոնը հանձնարարել է միջոցներ ձեռնարկել երկրի կարևոր ենթակառուցվածքներն ու պաշտպանական արդյունաբերության ձեռնարկությունները հնարավոր դիվերսիաներից պաշտպանելու համար։

Լեհաստանի վարչապետ Դոնալդ Տուսկն ավելի վաղ զգուշացրել էր, որ Ռուսաստանը կարող է փորձել հարվածներ հասցնել Ուկրաինային աջակցող երկրներին՝ դրանք ներկայացնելով որպես «պատահական միջադեպեր» և այդ կերպ ստուգելով ՆԱՏՕ-ի միասնականությունը։

The Telegraph-ի փոխանցմամբ՝ արևմտյան հետախուզական ծառայությունները հետևում են նաև Ռուսաստանի զինված ուժերի թվաքանակի հնարավոր ավելացման նախապատրաստական քայլերին։ Միաժամանակ մոտ 300 հազար մարդու ընդգրկմամբ լայնածավալ բաց մոբիլիզացիան այս պահին քիչ հավանական է գնահատվում։