Ստեփանակերտի բոլոր հանրակրթական դպրոցները պետք է անցնեն ուսուցման հեռավար եղանակի. ԱՀ ԿԳՄՍ
Արցախի Հանրապետության կրթության, գիտության, մշակույթի և սպորտի նախարարությունը հայտնում է․ «Հարգելի՛ ուսուցիչներ, սիրելի՛ աշակերտներ Ս.թ նոյեմբերի 19-ին ԱՀ կառավարությունում «Covid-19»-ի իրավիճակի վերահսկման համար տեղի ունեցած խորհրդակցության ընթացքում Արցախի հանրակրթական դպրոցներում դասագործընթացների կազմակերպման վերաբերյալ կայացվել է հետևյալ որոշումը. Ս.թ. նոյեմբերի 22-ից մինչև դեկտեմբերի 4-ը Ստեփանակերտի բոլոր հանրակրթական դպրոցները պետք է անցնեն ուսուցման հեռավար եղանակի։ Արցախի շրջանների դպրոցները կշարունակեն գործել առկա՝ պահպանելով հակահամաճարակային կանոնները, սակայն այն դպրոցները, որտեղ կգրանցվեն կորոնավիրուսային համավարակի դեպքեր, ևս կանցնեն ուսուցման հեռավար եղանակին։ Նախադպրոցական հաստատությունների աշխատանքը շարունակելու է մնալ դադարեցված։ Հաշվի առնելով համավարակի տարածման և գրանցված մահերի մտահոգիչ վիճակագրությունը՝ ԱՀ առողջապահության նախարարությունը կոչ է անում հետևել հակահամաճարակային կանոնների պահպանմանը, պատվաստվել՝ վերականգնելով հանրապետության բնականոն կենսագործունեությունը»:
