Իրանահայերի որևէ արտառոց հոսք դեպի Հայաստան չկա. Զարեհ Սինանյան
- Mar 17
- 1 min read
Իրանահայերի որևէ արտառոց հոսք դեպի Հայաստան չկա, այս մասին ԱԺ-ում լրագրողների հետ ճեպազրույցում վստահեցրեց Սփյուռքի գործերի գլխավոր հանձնակատար Զարեհ Սինանյանը:
«Որպես այդպիսին հայերի փախուստ, շարժ դեպի Հայաստան չկա։ Մենք անընդհատ փորձում ենք կապի մեջ լինել, պարբերաբար հնարավոր է լինում, սակայն հիմնականում ոչ։ Մարդիկ տներում են, զգույշ, պարզապես փորձում են վտանգավոր վայրերից հեռու մնալ, հույս ունեն, որ շուտով այս ամենը կվերջանա»,- նշեց պաշտոնյան:
Նրա խոսքով՝ տեղեկություն կար, որ թեթև վիրավորում ստացած 2 իրանահայ կա, սակայն պարզվում է` այնքան էլ հստակ չի եղել ինֆորմացիան։
Զարեհ Սինանյանը պնդում է, թե հանձնակատարին հրահանգ չի եղել, որ սփյուռքի կառույցներին զգուշացվի՝ Արցախի թեմային չանդրառանան` չվնասելու համար ՀՀ արտաքին քաղաքականությանը:
«Ես գիտեմ, թե ինչ հայտարարություններ կարող եմ անել, և որ հայտարարություններն են համահունչ այսօրվա մեր արտաքին քաղաքականությանը, և այդ սահմաններում ես գիտեմ` ինչպես մնալ»,-ասաց նա:
