Այս իշխանության վերաբերմունքը լրագրողների հանդեպ ավելի վատն է, քան նախկին բոլոր իշխանությունների օրոք. Արամ Աբրահամյան

«Սա սովորական ընտրություն չէ, չեմ չափազանցնի, եթե ասեմ, որ մենք գնում ենք դեպի պետության կործանում, ինքնիշխանության կորուստ։ Ում համար թանկ են օրինականությունը, սահմանադրականություն, ժողովրդավարությունը, անպայման պետք է մասնակցեն ընտրություններին, գնան ընտրատեղամաս։ Խորհուրդ եմ տալիս ձայն տալ այն ընդդիմադիր ուժին, որը հաստատ հաղթահարելու է անցողիկ շեմը և չի համագործակցելու իշխանության հետ»,- «Հարցեր կան» հաղորդմանն ասել է «Առավոտ» օրաթերթի գլխավոր խմբագիր Արամ Աբրահամյանը։

«Նիկոլ Փաշինյանը բոլոր նրանց, ովքեր իր հետ համաձայն չեն, համարում է թշնամի և հայտարարում է այդ մասին։ Լրագրողներիս նույնպես հռչակել է թշնամի։ Իշխանականները հարցնում են՝ ո՞վ է ձեզ ֆինանսավորում։ Սա հնացած հարց է՝ 90-ականներից եկող, որովհետև այն տարիներին սև շրջանառություն կար։ Հիմա լրատվամիջոցներն աշխատում են պայմանագրերով, ինձ ֆինանսավորում է նաև ՔՊ-ն, որովհետև ես համարում եմ, որ եթե բոլոր կուսակցությունների գովազդը կա մեր կայքում, ուրեմն ՔՊ-ինն էլ պետք է լինի։

Ինչ վերաբերում է ակնարկին, թե շնորհակալ եղեք՝ հիմա լրագրողներին չեն ծեծում, ապա դա աբսուրդ է։ Այս իշխանության վերաբերմունքը լրատվամիջոցների, լրագրողների հանդեպ ավելի վատն է, քան եղել է նախկին բոլոր իշխանությունների օրոք։ Այն ատելությունը, ագրեսիան, որ գեներացնում են Փաշինյանն ու ՔՊ-ն, առաջ է բերում  այնպիսի մի վիճակ, երբ մարդկանց միջև ստեղծվում են պատեր, սառույց է առաջանում, որը Փաշինյանի հեռանալուց հետո էլ հեշտ չի լինելու հալեցնել։ Նոր իշխանությունը պետք է հաշտության քայլեր անի»։