Պետական պահպանության ծառայությունը պետք է զարգանա որպես ինքնուրույն հատուկ ծառայություն․ Փաշինյան

Վարչապետ Նիկոլ Փաշինյանը ներկա է գտնվել Պետական պահպանության ծառայության կազմավորման օրվան նվիրված հանդիսավոր նիստին:

Վարչապետը շնորհավորել է ՊՊԾ ծառայողներին տոնական օրվա առիթով և շնորհակալություն հայտնել Հայաստանի Հանրապետությանը մատուցած և մատուցվող ծառայությունների համար։ 

Նիկոլ Փաշինյանի խոսքով՝ Պետական պահպանության ծառայության զարգացման արդյունքներն արդեն տեսանելի են՝ ծառայողների համազգեստից մինչև սպառազինությունն ու տեխնիկական հագեցվածությունը։ 

Վարչապետն անդրադարձել է նաև ծառայության ֆինանսավորմանը։

 «Շատ էական ներդրում է արվում ծառայության աշխատողների որակավորման բարձրացման ուղղությամբ։ Մենք ամեն ինչ անում ենք, որպեսզի ծառայողներն իրենք շահագրգռված լինեն այդ փոփոխություններով, կրթության շարունակականության, լեզուների իմացության, պրոֆեսիոնալ հատկությունների շարունակական զարգացմամբ»։,-նշել է վարչապետը։

Վարչապետը կարևորել է նաև միջազգային համագործակցության ընդլայնումը՝ նշելով, որ այն ապահովում է ավելի լայն հասանելիություն և արդյունավետ հաղորդակցություն միջազգային գործընկերների հետ։ 

Վարչապետը կարևորել է նաև Պետական պահպանության ծառայության աշխատողների համար սոցիալական երաշխիքների պատշաճ մակարդակի ապահովումը։

 «Գործիքը կամավոր ատեստավորումը պետք է լինի, և կամավոր ատեստավորման ամեն շրջափուլ իր հետ պետք է բերի սոցիալական երաշխիքների ավելի բարձր մակարդակ։ Սա պետք է լինի շարունակական»։,- նշել է նա։

Երկրի ղեկավարն ընդգծել է նաև Պետական պահպանության ծառայության ինստիտուցիոնալ առումով զարգացման անհրաժեշտությունը, որովհետև այն պետության կարևորագույն հատուկ ծառայություններից մեկն է։

 «Նախկինում այս ընկալումն այդքան էլ չի եղել, որովհետև ծառայությունը եղել է Ազգային անվտանգության ծառայության կազմում և ինքնուրույն կարողությունների զարգացում առանձնապես անհրաժեշտ չի համարվել։ Կարծում եմ՝ հիմա այն փուլն է, որ ծառայությունը նաև ինքնուրույն, որպես հատուկ ծառայություն, սրանից բխող բոլոր հարցադրումներով և պատասխաններով՝ անպայման պետք է զարգանա, և դա նաև կառուցվածքային որոշակի փոփոխություններ է ենթադրում»։,- նշել է վարչապետը

Նիկոլ Փաշինյանը նաև նշել է, որ Պետական պահպանության ծառայությունը դարձել է ավելի գրավիչ երիտասարդների համար՝ ընդգծելով, որ այդ ուղղությամբ աշխատանքները պետք է շարունակական լինեն։

Միջոցառմանը ելույթ է ունեցել նաև Պետական պահպանության ծառայության պետ Արթուր Գասպարյանը, որը ներկայացրել է համակարգի գործունեության բարելավմանն ուղղված իրականացվող աշխատանքներն ու առաջիկա ծրագրերը։

Ծառայողական պարտականությունները բարեխղճորեն և նվիրումով կատարելու համար Պետական պահպանության ծառայության մի շարք աշխատակիցներ վարչապետ Նիկոլ Փաշինյանի կողմից պարգևատրվել են։