Զինված ուժերում ստեղծված են անհավասար պայմաններ, նույնիսկ «բատինկաներն են» ամեն մեկի հագին տարբեր. Գեղամ Մանուկյան
- Feb 11
- 1 min read
Պարոն Պապիկյան, օրերս նոր մոդուլային զորամասի բացման ժամանակ, աչքովս ընկավ շարք կազմած բարձրաստիճան զինվորականների բատինկաները: Եթե նայեք լուսանկարները, կտեսնեք, որ ամեն մեկի հագին տարբեր բատինկաներ են: Այս մասին ԱԺ նիստում ասել է «Հայաստան» խմբակցության պատգամավոր Գեղամ Մանուկյանը:
«Հրամանը տվել եք, որ սպիտակ բատինկաներ պետք է հագնեն, բայց որտեղի՞ց այդ բատինկաները, ով որ խանութից կարողանում է, գտնում է:
Զինված Ուժերում ստեղծված են անհավասար պայմաններ: Դիցուք՝ այսօրվա քննարկումը ԱԺ-ում լսող թիկունքային ծառայության այն զինծառայողները, որոնց ատեստացիայի հերթը դեռ չի հասել, ստանում են շատ ավելի նվազ աշխատավարձ, քան ատեստացիա անցածը:
Լսում եմ շատ պայմանագրային զինծառայողներից՝ տարիներով մարտական հերթապահություն իրականացրած, որոնք և սուբյեկտիվ, և օբյեկտիվ պատճառներով՝ ատեստացիայի անհրաժեշտ շեմը չեն կարողացել հաղթահարել, բայց գլուխը կախ՝ չարքաշ կյանքով, շարունակում են ծառայել հանուն Հայաստանի Հանրապետության:
Շատ ուրախալի է լսել թվեր՝ 700,000-800,000 դրամ, և այո, զինվորականը պետք է շատ բարձր վարձատրվի, բայց այդ վարձատրության և ատեստացիայի ինստիտուտի ներդրման ժամանակ՝ ի սկզբանե այն բոլոր մտահոգությունները, որ մեր մոտ կային ստեղծվելիք անհավասարությունների մասին, չեն փարատվել, դեռ ավելի են խորացել»,- նշել է նա:
