Իրանի և Թուրքիայի արտգործնախարարները քննարկել են Իրանում տեղի ունեցող ցույցերը. Թուրքիայի ԱԳՆ

Թուրքիայի արտաքին գործերի նախարար Հաքան Ֆիդանը հեռախոսազրույց է ունեցել իրանցի գործընկեր Աբբաս Արաղչիի հետ՝ Իրանում ստեղծված իրավիճակը քննարկելու համար, հայտնել է Թուրքիայի ԱԳՆ-ն՝ ТАСС-ի փոխանցմամբ։

«Զրույցի ընթացքում քննարկվել են Իրանում տեղի ունեցող վերջին զարգացումները», - նշել է նախարարությունն՝ առանց մանրամասներ հաղորդելու։

Հիշեցնենք, որ 2025 թվականի դեկտեմբերի 29-ին Թեհրանում առևտրականները և բիզնեսի ներկայացուցիչները սկսել են բողոքի ցույցեր՝ իրանական ռիալի կտրուկ անկման պատճառով։ Ցույցը հետագայում վերածվել է անկարգությունների, որոնք տարածվել են խոշոր քաղաքներում։  Հունվարի 8-ից, ըստ արտգործնախարար Արաղչիի, ցուցարարների շարքում հայտնվել են զինված ահաբեկիչներ։ Իրանի իշխանությունները մեղադրել են Իսրայելին և Միացյալ Նահանգներին անկարգությունները կազմակերպելու համար։ ԱՄՆ նախագահ Դոնալդ Թրամփը նախկինում հայտարարել էր, որ լրջորեն քննարկում է Թեհրանի դեմ ուժի կիրառումը։ Ակնկալվում է, որ շուտով նրան կներկայացվեն Իրանում տեղի ունեցող իրադարձություններին արձագանքելու տարբերակներ, այդ թվում՝ երկրի ներսում թիրախներին հարվածելու հնարավորություն։ Reuters-ի հաղորդմամբ՝ ցույցերի ժամանակ զոհվել է առնվազն 3000 մարդ: