Ռուսաստանը սկսում է դիզվառելիքի խոշոր մատակարարումներ․ Եվրոպայում զայրացած են

ՌԴ նախագահի մամուլի քարտուղար Դմիտրի Պեսկովը հայտարարել է, որ ռուսական դիզելային վառելիքը սկսել է մուտք գործել համաշխարհային շուկա, և դա կնպաստի էներգետիկ շուկայի կայունացմանը՝ չնայած ոչ ամբողջությամբ: Այս մասին հաղորդում է «ՏԱՍՍ» գործակալությունը:

«Ներկայում հասանելի է դառնում բավականին մեծ քանակությամբ դիզելային վառելիք։ Այդ դիզելային վառելիքը սկսել է մուտք գործել համաշխարհային շուկաներ, և դա որոշակի դրական ազդեցություն կունենա նավթային շուկաների կայունացման վրա։ Թեև սա չի կարողանա ամբողջությամբ կայունացնել դրանք. այս հանգամանքն էլ պետք է հաշվի առնել», - նշել է Կրեմլի ներկայացուցիչը։

Հաղորդվում է, որ Պեսկովն այս հարցին պատասխանել է Ռուսաստանի և ԱՄՆ-ի միջև դիզելային վառելիքի գործարքի համատեքստում։ Պեսկովին նաև հարցրել են, թե Կրեմլն ինչպես է գնահատում այդ պայմանավորվածության նկատմամբ միջազգային արձագանքը:

«Մենք նախկինի պես տեսնում ենք եվրոպական երկրների ապակառուցողական դիրքորոշումը։ Նրանք ոչ միայն չողջունեցին այս գործարքը, այլև բավականին կոշտ քննադատության ենթարկեցին այն, ինչպես նաև անձամբ (ԱՄՆ) նախագահ Թրամփին և ամերիկյան վարչակազմի նմանատիպ որոշումները», - նշել է ՌԴ նախագահի մամուլի քարտուղարը։

Կրեմլի խոսնակը նաև հրաժարվել է ասել, թե ԱՄՆ-ից բացի որ երկրներն են ցանկություն հայտնել ռուսական դիզվառելիք ձեռք բերել:

Նա նաև նշել է, որ էներգակիրների համաշխարհային շուկայում իրավիճակն այժմ լարված է, և դա կապված է, այդ թվում, ռուսական նավթի և նավթամթերքի արտահանման սահմանափակումների հետ:

Ավելի վաղ ՌԴ փոխվարչապետ Ալեքսանդր Նովակը հայտնել էր, որ Ռուսաստանն անմիջապես՝ նախատեսված ժամանակից շուտ, սկսում է չեղարկել դիզելի արտահանման նկատմամբ սահմանափակումները: Նա նշել է, որ Ռուսաստանը պատրաստ է ԱՄՆ-ի շուկա և իր բոլոր գործընկերներին մատակարարել դիզելային վառելիքի լրացուցիչ ծավալներ՝ հոկտեմբերին՝ 300 000 տոննա, նոյեմբերին՝ 500 000 տոննա, իսկ դեկտեմբերին՝ 1 միլիոն տոննա։ Ապագայում այդ ծավալը կարող է հասնել ամսական մինչև 3,5 միլիոն տոննայի։