Առողջապահության նախարարը պատասխանել է դեղերի գնման և բուժման պետպատվերների վերաբերյալ հարցերին
Հայաստանում, երբ դեղը գրանցվում է, դրան նախորդում է երկար նախակլինիկական փորձարկում, իրականացվում է մոնիտորինգ, հետազոտություն, որից հետո դեղը համարվում է արդյունավետ։ Այս մասին դեկտեմբերի 13-ին լրագրողների հետ հանդիպման ժամանակ ասաց ՀՀ առողջապահության նախարար Անահիտ Ավանեսյանը։
«Դեղի գրանցումից հետո դրա որակի նկատմամբ վերահսկողությունը չի ավարտվում։ Ունենք նաև կողմնակի ազդեցությունների գրանցման համակարգ, որը բժիշկն արձանագրում է դրանց առաջացման դեպքում։ Այս բոլոր մեկնաբանությունները հավաքվում են, և անհրաժեշտության դեպքում ձևավորվում է աշխատանքային խումբ, որը կարող է դադարեցնել դեղամիջոցի օգտագործումը՝ ելնելով արտադրական գործընթացի մոնիտորինգի արդյունքներից։ Մենք, իհարկե, խթանում ենք հայրենական արտադրությունը, բայց մեզ համար առաջնային է հիվանդի առողջությունը։
Մենք բաց մրցույթ ենք անցկացնում, սակայն հայկական շուկայի փոքր լինելու պատճառով մասնակցության խնդիրներ են առաջանում։
2025 թվականից դեղերի ձեռքբերման նոր չափանիշ կներդրվի։ Սկսենք սրտանոթային համակարգի հիվանդություններից։ Մենք կկազմենք դեղերի ցանկ՝ փոխհատուցման գներով։ Սա նշանակում է, որ հիվանդն ինքը կորոշի, թե որ դեղամիջոցն է ուզում գնել, որից հետո մենք դեղատներին որոշակի գումար կփոխհատուցենք այս դեղը գնելիս։ Սա հիվանդին հնարավորություն կտա ընտրել այնպիսի դեղամիջոց, որը և՛ բժշկին, և՛ իրեն թվում է ամենաարդյունավետը:
Երկու տարվա ընթացքում բոլոր դեղերի գնումների գործընթացը պետք է փոխվի նոր համակարգի»,- ընդգծեց Ավանեսյանը։
Նա նաև նշեց, որ պետական պայմանագրով հիվանդին բուժելիս բժիշկն իրավունք չունի հավելյալ վճարներ գանձել։ Նրա գնահատականներով՝ որոշ ծառայությունների գները օբյեկտիվորեն թանկացել են։
«Որոշ վիրաբուժական ծառայությունների համար գների վերանայման անհրաժեշտություն կա, որն իրականացվում է աստիճանաբար։
Ծախսային այս հոդվածը կարևոր տեղ է զբաղեցնում 2025 թվականի բյուջեում։ Հաշվի առնելով նաև քաղաքացիների բողոքները՝ ծախսերն ուղղված են շտապ վերակենդանացման ծառայությունների և հարակից դեղերի ընդլայնմանը։ Գները կվերանայվեն նաև մանկական վիրաբուժության ծառայությունների համար։
Որոշումները պետք է վերանայվեն, որպեսզի այն գինը, որով կառավարությունը գնում է ծառայությունը, համապատասխանի արժեքին՝ պահպանելով պահանջվող չափանիշները: Այսինքն՝ պետք է ոչ միայն թանկացնել, այլ ապահովել, որ բժշկի աշխատավարձը նույնպես բարձրանա, ինչը կօգնի բարելավել բուժման որակը։ Պետք է աշխատենք թե՛ գների, թե՛ մատուցվող ծառայությունների ծավալի վրա»,- նշել է նախարարը։
