Լայնածավալ կիբեռհարձակում Ադրբեջանի դեմ. կասկածներ՝ Թուրքիայի ուղղությամբ
Արտասահմանյան հաքերային խումբը լայնածավալ կիբեռհարձակում է իրականացրել Ադրբեջանի պետական տեղեկատվական ենթակառուցվածքների վրա։ Այս մասին հայտնել է Ադրբեջանի հատուկ կապի և տեղեկատվական անվտանգության պետական ծառայությունը։
Գերատեսչության տվյալներով՝ հարվածի տակ ավելի քան 100 պետական դոմեն է հայտնվել։ Արդյունքում մի քանի պետական մարմինների կայքերի աշխատանքը խափանվել է։
Սոցցանցերում տեղի ունեցածի մեջ թուրքական հետք են տեսել։ Բանն այն է, որ Թուրքիայում վերջին օրերին քննադատության ալիք է բարձրացել Ադրբեջանի հասցեին՝ ինչպես Բաքվի ներքին որոշումների, այնպես էլ արտաքին քաղաքականության պատճառով։ Թուրքիայի կրոնական և պահպանողական շրջանակներում քննադատում են Ադրբեջանի դպրոցներում հիջաբ կրելու սահմանափակումները՝ դրանք համեմատելով կոշտ սեկուլյարիստական (աշխարհիկ) միջոցների պատմական շրջանի հետ։
Դժգոհություն են առաջացնում նաև Իսրայելի հետ Ադրբեջանի հարաբերությունները և Բաքվի դիրքորոշումը միջազգային ասպարեզում։ Բանը հասել է նրան, որ բողոքի ցույցեր են տեղի ունեցել Անկարայում և Ստամբուլում գտնվող Ադրբեջանի դեսպանատների մոտ։
Միևնույն ժամանակ Բաքվում հայտարարում են, որ Ադրբեջանը, ինչպես և Թուրքիան, աշխարհիկ պետություն է, ուստի «կրթական քաղաքականությունը քաղաքական մանիպուլյացիայի առարկա դարձնելն անթույլատրելի է»։ Ադրբեջանի իշխող կուսակցությունը կոչ է արել Թուրքիայի քաղաքական գործիչներին չմիջամտել իր ներքին գործերին։
