Վատ հոտառությունը բարձրացնում է սրտի իշեմիկ հիվանդության առաջացման հավանականությունը․ JAMA
- Lilit
- Nov 11
- 1 min read
Միչիգանի պետական համալսարանի հետազոտողների կարծիքով՝ տարեց մարդկանց հոտառության թուլացումը կարող է վկայել սրտի իշեմիկ հիվանդության (ՍԻՀ) բարձր վտանգի մասին: Հետազոտությունը հրապարակվել է JAMA Otolaryngology-Head & Neck Surgery ամսագրում:
Հետազոտողները Atherosclerosis Risk in Communities Study երկարաժամկետ հետազոտությունում վերլուծել են ավելի քան 5 000 մասնակիցների տվյալները: Հետազոտության սկզբում կամավորները սիրտ-անոթային հիվանդության նշաններ չունեին: Հոտառության զգացողությունը գնահատվել է 12-հոտային թեստի միջոցով, որի արդյունքները բաժանվել են երեք կատեգորիայի՝ լավ, միջին եւ վատ:
Հետազոտության 10 տարվա ընթացքում 280 մարդու մոտ (5.4 տոկոս) առաջացել է սրտի իշեմիկ հիվանդություն: Վերլուծությունը ցույց է տվել, որ հոտառության վատ զգացողությունը կրկնապատկում է ՍԻՀ ռիսկը՝ լավ հոտառության համեմատ: Այս կապը առավել ցայտուն է եղել հետազոտության առաջին տարիներին (հավանականության հարաբերակցությունը՝ 2.06՝ երկու եւ 2.02՝ չորս տարի անց), բայց աստիճանաբար թուլացել է իններորդ տարում: Նույնիսկ տարիքային եւ բժշկական գործոնները (ներառյալ խոլեստերինի մակարդակը, ծխելը եւ դիաբետը) հաշվի առնելուց հետո կապը մնացել է վիճակագրորեն նշանակալի: Միջին աստիճանի հոտառության խանգարում ունեցող մարդիկ նույնպես ունեցել են սրտի հետ կապված խնդիրների առաջացման բարձր, բայց ոչ այնքան արտահայտված ռիսկ։
Այս կապի մեխանիզմները դեռեւս պարզ չեն։ Գիտնականները ենթադրում են, որ հոտառության խանգարումը կարող է լինել համակարգային ծերացման վաղ նշան, որն արտացոլում է նյութափոխանակության խանգարումները կամ անոթային փոփոխությունները, որոնք նախորդում են սրտի հիվանդություններին։
«Եթե մեկը նկատում է հոտառության ֆունկցիայի անհասկանալի անկում, լավ կլինի անցնել համապարփակ հետազոտություն։ Սա կարող է օգնել բացահայտել այլ ռիսկի գործոնները»,- նշել է Northwell Health-ի սրտաբան Նիլ Շահը։
