Ջոնի Դեփին հնարավոր է կրկին տեսնենք խորհրդանշական Ջեք Ճնճղուկի դերում

Հայտնի պրոդյուսեր Ջերի Բրուքհայմերը Entertainment Weekly-ին ասել է, որ բանակցություններ է վարում Ջոնի Դեփի հետ «Կարիբյան ծովի ծովահենները» ֆրանշիզայի վեցերորդ ֆիլմի շուրջ: Նրա խոսքով, եթե դերասանը գոհ լինի սցենարից, նա պատրաստ է կրկին փորձել կապիտան Ջեք Ճնճղուկի կերպարը:

«Եթե նրան դուր գա դերի գրված ձևը, կարծում եմ՝ նա կհամաձայնվի», - ասել է 81-ամյա պրոդյուսերը:

Ջոնի Դեփը առաջին անգամ խաղացել է Ջեք Ճնճղուկի դերը 2003 թվականի «Կարիբյան ծովի ծովահենները. Սև մարգարտի անեծքը» ֆիլմում, ապա նկարահանվել է չորս շարունակություններում: Չնայած Դեփի ներկայացուցչի 2022 թվականին արված հայտարարությանը, որ դերասանը չի պլանավորում վերադառնալ ֆրանշիզա, 2023 թվականին դերասանին մոտ աղբյուրը հայտնել է նրա մասնակցության հնարավորության մասին նոր նախագծերում: Պրոդյուսերը մանրամասնեց, որ Disney-ը միաժամանակ աշխատում է երկու ֆիլմի վրա՝ ֆրանշիզայի վերագործարկման և Մարգո Ռոբիի մասնակցությամբ առանձին ֆիլմի, որը մշակվում է 2020 թվականից: «Դրանք երկու տարբեր ֆիլմեր են, և մենք հույս ունենք նկարահանել երկուսն էլ: Disney-ը նույնպես հետաքրքրված է», - ասաց Բրուքհայմերը։

Ինչ վերաբերում է վերագործարկմանը, որի սցենարը գրել է Ջեֆ Նաթանսոնը, Բրուքհայմերը նշեց. «Եթե ինձնից կախված լիներ, Ջոնին կնկարահանվեր այս ֆիլմում. չէ՞ որ Ջեք Ճնճղուկը նրա ստեղծագործությունն է»: Պրոդյուսերի խոսքով՝ Դեփը Ջեքի բնավորությունն ու վարքագիծը փոխառել է Պեպե Լե Պյուի և Քիթ Ռիչարդսի կերպարներից, ինչը կերպարը դարձրել է եզակի։

Թիմը ներկայումս շարունակում է կատարելագործել սցենարը, և չնայած այն դեռ պատրաստ չէ, Բրուքհայմերը վստահ է, որ «սցենարիստը բացահայտել է պատմության բանալին, հատկապես դրա ուժեղ ավարտը»: