Ջորջ Քլունին հիշել է, թե ինչպես է մի անգամ Բրեդ Փիթն իրենից «գողացել դերը». «Ես զայրացած էի»

Ջորջ Քլունին անկեղծորեն խոսել է իր կարիերայի սկզբում ամենամեծ «ի՞նչ կլիներ, եթե» իրավիճակի մասին՝ թե ինչպես է նա բաց թողել այն դերը, որը կարող էր ամեն ինչ փոխել: Նա նկատի ունի Ջեյ Դիի դերը լեգենդար «Թելմա և Լուիզ» ֆիլմում, որը, ի վերջո, տրվել է Բրեդ Փիթին և դարձել նրա մուտքը մեծ կինոարվեստում:

64-ամյա դերասանը The Sunday Times-ին տված հարցազրույցում խոստովանել է, որ 80-ականների վերջին երազում էր դուրս գալ հեռուստասերիալներից և վերջապես լուրջ դեր ստանալ կինոյում: Եվ թվում էր, թե իր հնարավորությունը շատ մոտ էր. «Ես հասա վերջին լսումներին: Եվ, հանկարծ, Բրեդը ստացավ  այդ դերը»,- հիշում է Քլունին:

Նա ասել է, որ այնքան վշտացած է եղել, որ տարիներ շարունակ չի կարողացել դիտել ֆիլմը. «Ես նյարդայնացած էի: Այդ դերը պայթեցրեց նրա կարիերան: Այդ ժամանակ նա նկարահանվում էր սիթքոմներում և այլ տեսակի բաներում: Եվ դա կարող էր լինել իմ մեկնարկը»:

Ժամանակի ընթացքում ամեն ինչ փոխվել է. դերասանները դարձել են ընկերներ, միասին նկարահանվել «Օուշենի ընկերները» ֆիլմում և վաղուց կատակում են «կորած» դերի մասին: Երբ Քլունին վերջապես տեսավ «Թելման և Լուիզը», նա ընդունեց, որ ռեժիսոր Ռիդլի Սքոթի որոշումը ճիշտ էր. «Երբ ես տեսա ֆիլմը, հասկացա, որ նա պետք է ստանար այդ դերը»: