ՌԴ-ում թոշակառուն հավատացել է խաբեբաներին և նրանց փոխանցել ավելի քան 22 միլիոն ռուբլի
- Lilit
- Nov 27, 2024
- 1 min read
Սանկտ Պետերբուրգի բնակչուհին խարդախներին փոխանցել է ավելի քան 22 միլիոն ռուբլի։ Այս մասին, gazeta.ru-ի փոխանցմամբ, հայտնել են ՌԴ ՆԳՆ տարածքային վարչությունից։
Խաբեբաները տուժողի հետ առաջին անգամ կապ են հաստատել մի քանի ամիս առաջ և ներկայացել որպես բանկի աշխատակիցներ։ Նրանք ասել են, որ 67-ամյա թոշակառուի դրամական միջոցները, իբր, վտանգի տակ են, ուստի իրենց համար կարևոր է ապահովել անվտանգությունը։ Դա անելու համար հարկավոր է գումարը փոխանցել այն անձին, որին նրանք կուղարկեն: Արդյունքում երկու ամսվա ընթացքում պետերբուրգցի կինն իր խնայողությունների մի մասը տվել է իր մոտ եկած մարդկանց, իսկ մնացածն ուղարկել է խաբեբաների նշած հաշվեհամարներին։
Ընդհանուր առմամբ, անհայտ անձինք թոշակառուից ստացել են 22,6 մլն ռուբլի։
«Կինը մինչև վերջերս չէր ուզում հավատալ, որ խաբեբաների զոհ է դարձել, ուստի երկար ժամանակ չէր դիմել ոստիկանություն», - հայտնում է հրատարակությունը։
Դեպքի առթիվ գործ է հարուցվել խարդախության հոդվածով։ Ներկայումս կատարվում է հետաքննություն։
